[retour à un affichage normal]

Si ce gentil berger arrousant son beau sein
De ses pleurs les tesmoings d’une amitié non feinte.
Celle dont il se deult, de pitié n’est atteinte,
Qu’Amour ses feux esteigne, il les allume en vain.

Celle qui le verra, sans aymer ce visage,
D’une Tygre cruelle aura bien le courage
Mais s’il en est amant, sans qu’aussi-tost aprez.

Elle n’aille bruslant d’une seconde flame,
Outre qu’elle a sans doubte, un rocher pour une ame,
Il faut croire qu’Amour n’a ny flames ny traicts.

Ces vers avoient esté escrits par la Nymphe Leonide, lors que ne pouvant persuader à Celadon de laisser la triste vie qu’il passoit en ce lieu, elle le venoit visiter presque tous les jours, & parce quelle ne pouvoit chasser de son ame la passion qu’elle avoit pour luy, esmeuë de pitié de le voir en cest estat, elle escrivit ces vers, pour tesmoignage du resentiment qu’elle en avoit.

Lors que Philis ouyt le nom de Celadon, pour certain, dit-elle, c’est bien icy le lieu des merveilles, car il ne faut point douter que tout ce qui est icy, ne soit fait pour Celadon, & toutefois nous sçavons bien qu’il est mort : Et comment le sçavez vous : adjousta Alexis, Astrée l’interrompant, il n’en faut point doubter, dit-elle, je l’ay veu mourir, & depuis quelque temps apres, j’ay veu son esprit. Mais mon Dieu ma compagne, continua-t’elle, laissons le en repos : & lors s’en voulant aller, Diane la retint, en luy disant, Les vers que je viens de lire sont escrits d’une autre main, mais voyez ce qui est dans ce papier, si je ne me trompe, ce sont les mesmes caracteres que les premiers, & lors elles leurent toutes ensemble telles parolles.

SOUSPIRS.

I

Souspirs enfans de ceste pensée, qui sans cesse me tourmente, comment par vostre violence n’esteignez vous le feu de mon ame, ou comment ne l’allumez-vous de telle sorte qu’il me puisse consumer entierement.

II.

Souspirs, qui soulez estre le soulagement de celuy de qui la douleur vous conçoit, pourquoy à mon dommage changez-vous ceste coustume rengregeant les cruels desplaisirs qui me tourmentent ?

III.

Souspirs, si vous sortez du profond de mon cœur, avec une si grande peine, pourquoy ne l’emportez-vous plustost où vous allez, afin de me donner ou la mort en me la ravissant, ou la vie en la portant au lieu où est la source de ma vie ?

IIII.

Souspirs, puis que c’est mon cœur qui vous donne naissance, & que l’Amour est celuy qui vous envoye vers celle où vous allez, pourquoy ne m’en rapportez-vous des nouvelles, afin de conserver la vie de celuy de qui vous naissez ?

V.

Souspirs qui naissiez autrefois dans l’excez de mon contentement, comment prenez-vous à ceste heure naissance dans le plus fort accez de mes desplaisirs ?

VI.

Souspirs, les tesmoings d’une ame qui desire, comment sortez vous de mon cœur, puis que tous mes espoirs estans perdus, tous mes desirs doivent estre estouffez ?

Mal-aysément ces belles bergeres eussent peu laisser un seul de ces rouleaux qui estoient sur les autels, sans les desployer & les lire, si Adamas qui alloit declarant à Daphnide & à Alcidon, les secrets du temple de l’Amitié, & de celuy de la Déesse Astrée, ne les eust interrompues. Elles donc pour luy faire place sortirent hors de ce lieu, & encores que personne de la trouppe n’en peust scavoir plus des nouvelles qu’Alexis, si est-ce qu’il n’y en avoit pas une qui en fist plus l’estonnée, leur demandant fort curieusement toutes les moindres choses qu’elle y voyoit. Estans sorties elles trouverent Hylas prez de la fontaine, qui s’y estoit assis pour ne vouloir non plus entrer dedans ce temple à cette fois qu’à la premiere. D’abord qu’Alexis le vit, ne sçachant pourquoy il ne les avoit suivies : Et que faictes vous icy, mon serviteur, luy dit-elle, cependant que nous venons de voir le plus beau lieu qui soit en ceste contrée ? Ma Maistresse, respondit-il, j’ay pensé que je vous donnerois plus de desir de me revoir, quand je vous priverois pour quelque temps de ma veuë : Il ne faut point repliqua t’elle, que vous usiez de cet artifice, car je ne sçaurois le desirer plus que je fais continuellement : Si cela estoit, reprit Hylas, vous fussiez demeurée icy aupres de moy, & n’eussiez pas preferé la curiosité de visiter ce lieu champestre au contentement que vous pouviez recevoir d’estre aupres d’Hylas : Je pensois adjousta Alexis en sousriant, que mon serviteur estoit si religieux envers ses deitez bocageres, qu’il seroit des premiers & des plus avancez auprez de leurs autels, & le croyant desja bien avant dedans ce temple, je l’y suis aller chercher : Si vous ne me cediez point autant en affection dit Hylas, que vous me devancez en merite, vous eussiez bien pris garde que j’estois demeuré à la porte, puis que j’ay bien veu quand vous estes entrée dedans : Et vous mon serviteur, dit incontinent la Druyde, ne me permettez vous pas de vous reprocher, que si vous aviez autant de bonne volonté pour moy que j’en ay pour vous, puis que vous avez veu que j’allois dans ce lieu sacré, vous m’y eussiez suivie, comme tres-volontiers je me fusse arrestée icy, si j’eusse pensé que vous y fussiez demeuré ? Ceste reproche n’est pas raisonnable, respondit Hylas, que sçay-je si le Dieu à qui ce bois est consacré, a agreable que j’y entre, ne voyez vous pas ce qui est escrit sur ceste porte ? Alors Alexis feignant de n’y avoir encore prit garde, elle y tourna les yeux, & vit en escrit.

Loing, bien loing, prophanes esprits,
Qui n’est d’un sainct Amour espris,
En ce lieu sainct ne fasse entrée :
Voicy le bois où chaque jour
Un cœur qui ne vit que d’Amour
Adore la Déesse ASTRÉE.

Et que voulez vous dire par là ? continua Alexis : Il veut dire, interrompit Silvandre, que n’estant point espris d’un sainct Amour, il n’ose mettre le pied en ce lieu sacré, de peur de le prophaner, & en cela, Madame, il se monstre plus religieux que parfaict Amant : Est-il possible, mon serviteur ? reprit Alexis, que Silvandre ait dit la verité ? Ma maistresse respondit Hylas tout en colere, avez vous envie que je vous ayme plus que je n’ay fait jusques icy ? J’en serois bien aise, dit Alexis : Esloignez donc de vous, dit-il, ces broüillons d’Amour, car tel peut-on bien nommer ce berger, qui nous vient embroüillant l’esprit par ses resveries. Chacun se mit à rire de la cholere de Hylas, & luy sans s’arrester aux autres, se tournant vers Silvandre, Penses-tu que je ne sois point entré, dit-il, dans ce bois, pour estre plus religieux que parfaict Amant. Le quel ; respondit Silvandre, veux-tu que je croye ? Lequel que tu voudras, repliqua Hylas : Or je diray donc, reprit Silvandre, que non point pour estre religieux, mais pour avoir peur du chastiment, tu n’as osé entrer en ce lieu sacré, non plus à ce coup que la premiere fois que nous y fusmes. Je ne veux pas desavoüer, respondit Hylas, que je ne craigne la main d’un Dieu courroucé : mais je dy bien, que quand cela seroit, ma crainte est plus estimable que ton outrecuidance : car ne sçais-tu pas qu’il n’y a personne qui ne soit atteinte de quelque imperfection de l’humanité ? He mon amy, pense-tu estre si parfaict, qu’il n’y ait point de soüilleure en toy ? Et cela estant, avec quelle effronterie oses-tu mettre le pied dans ce lieu deffendu ? Je confesse, respondit Silvandre, que ce que tu dis de l’imperfection humaine est en moy, mais non pour cela en toutes les autres personnes qui vivent, estant tres-asseuré qu’il y en a en cette compagnie qui sont sans imperfection : mais cela ne me peut empescher l’entrée de ce lieu sainct, puis qu’en la condition qu’il demande à ceux qui y peuvent entrer, je suis certain que je n’ay point de deffaut qui est en l’Amour, la mienne estant telle, que j’aymerois mieux la mort, que d’y souffrir aucun manquement.

Belle imagination je vous asseure, s’escria Hylas : Et dy moy, Silvandre, où sont ces parfaictes personnes que tu nous vas imaginant ? Tu as raison, respondit Silvandre, de demander où elles sont ? Je croy que malaisément les sçaurois-tu recognoistre, & toutesfois il y en a tant icy, que je ne me puis empescher de te les nommer. Qu’est-ce que tu reprendras en Philis ? Elle est trop gaye, dit Hylas. Et en Astrée ? adjousta le Berger, Elle est trop triste, respondit Hylas. Et en Diane ? continua Silvandre : Elle est trop sage, repliqua t’il. Et en Alexis ? reprit le Berger : Elle sçait trop, dict Hylas. Et en Leonide ? continua Silvandre ; Trop ou trop peu, respondit Hylas. Et en Celidée ? adjousta Silvandre, Sa vertu me faict horreur, repliqua-t’il. Mais que diras-tu de Florice ? dit le Berger ; Qu’elle a un mary jaloux, Respondit-il. Et quoy de Palinice ? reprit Silvandre, qu’elle croit aisement d’estre aymée, dit Hylas. Et de Circeine ? reprit le Berger, Qu’elle esmeut sans resoudre, repliqua-t’il. Et que reprendras-tu en Carlis : dit Silvandre, Qu’elle m’a trop & trop tost aymé, respondit Hylas. Et en Stiliane ? adjousta Silvandre, Qu’elle est trop fine, dict Hylas. Et en Daphnide ; continua le Berger, Qu’elle a perdu, respondit Hylas, ce qui la faisoit estimer plus belle. Et de Laonice qu’en diras-tu ? dit Silvandre, Que je ne l’ayme plus. Et de Madonte, dit le Berger, Qu’elle ressemble trop à Diane, respondit-il. O Dieux ! s’escria Silvandre, est-il possible que je ne puisse proposer personne où tu ne trouves quelque chose à redire ? Vous avez oublié, dict alors Diane, parmy nous la Bergere Stelle. Il est vray, reprit Silvandre, & que veux-tu dire de celle-là ; J’avoüe, dit alors Hylas, que si cette Bergere continuë à me plaire comme elle a faict depuis ce matin, je la trouveray bien à mon gré. Comment mon serviteur, dit incontinent Alexis, & me voudriez vous bien quitter pour elle ? Hylas apres avoir quelque temps pensé en luy mesme, respondit froidement, Ma maistresse, je ne vous veux pas quitter, mais je pourrois bien vous donner compagnie. Comment, reprit Alexis, vous ne vous contentez pas de moy ? je me plaindray de vous à tout le monde : Vous aurez tort, respondit Hylas, car ne m’avez vous pas dit, que vous vouliez que la loy fust égale entre nous ? Il est certain, repliqua Alexis. Or si elle doit estre égale, reprit-il, il me doit bien estre permis, en vous aymant d’en aymer encore une autre : puis que vous en faictes de mesme : Et qui voyez vous que j’ayme, dit-elle sinon vous ? Et qu’est-ce respondit-il, que vous faictes donc tout le jour avec ceste villageoise d’Astrée ? O mon serviteur, s’escria t’elle, c’est une fille : Et bien, dit Hylas, & moy aussi j’aymeray une fille : ah ! mon serviteur, dit la Druyde en riant, si vous estiez fille comme moy, cela seroit bon, mais autrement j’ay grande occasion d’estre jalouse : Ma maistresse, respondit froidement Hylas, demeurons sur ceste loy esgale, que vous avez accordée qui doit estre entre nous : Jamais dit-elle, je ne consentiray que cét outrage me soit fait : Et moy repliqua Hylas, je ne veux point me relascher d’un seul de mes privileges. De sorte interrompit Diane, que voicy le commencement d’un grand divorce ? Quant à moy, dit Astrée, je ne puis qu’y gaigner beaucoup, quoy qu’il en advienne, car si cela est cause que leur amitié se separe, me voila seule à posseder ceste belle Dame, & si elle ne se separe point, & qu’il soit permis à Hylas d’aymer aussi Stelle, j’auray tousjours un peu plus de loisir de me voir seule, cependant qu’il ira entretenir ceste nouvelle maistresse : Et moy, dit Hylas, je ne puis aussi qu’y gaigner beaucoup, car si nostre amitié se rompt, je demeureray libre, & si elle continuë, au lieu d’une, j’auray deux personnes qui m’aymeront : Si bien, adjousta Alexis, qu’il n’y a de la perte que pour moy, d’autant que si Hylas cesse de m’aimer, je perds l’amitié d’une personne que je cheris infiniment, & si elle me demeure avec ceste condition d’en pouvoir aymer un autre, je demeureray avec un demi serviteur, puis que ceste Stelle m’en ostera la moitié, de sorte que de quelque costé que ceste piece tombe, ce sera tousjours dans mon jardin : Mais, mon serviteur, n’y a-t’il point de moyen que vous soyez tout à moy, sans que Stelle y ait part ? Alexis disoit ces paroles avec une froideur telle, que l’on eust juge qu’elle en parloit à bon escient. Hylas de qui la constance commençoit à se lasser, & qui pensoit d’offencer grandement l’humeur qu’il avoit tousjours euë. Voyez vous, ma maistresse, dit-il, il faut se resoudre, je ne puis demeurer incertain : Laisserez-vous Astrée, ou prendray-je Stelle, ou bien romprons-nous le marché ? car en fin je suis marchand de parole : la loy que vous avez establie égale entre nous, m’oblige de m’opiniatrer à ce que je dis. Quelque force qu’Alexis se fist, si ne peut-elle s’empescher de rire des discours d’Hylas : & par ce qu’elle demeuroit trop à luy respondre ; Et quoy, reprit-il, vous vous amusez à rire, au lieu de me faire response ? Ne le trouvez estrange, dict Alexis, je ne me vis jamais en un semblable affaire, car j’aymerois mieux estre seule, que d’estre mal accompagnée. C’est à vous à choisir, respondit Hylas : Mais, mon serviteur, vous me mettez le marché si librement & si souvent en la main, que je croy que vous avez desja resolu de me quitter. Toute la troupe de ces bergers & bergeres s’estoit assemblée autour d’eux pour ouyr cette plaisante dispute, & entre les autres, Stelle y estoit accourue, qui s’oyant nommer, & sçachant que c’estoit pour elle que Hylas parloit ainsi. Madame, dit-elle, s’adressant à Alexis, consentez seulement que Hylas me serve, car ce sera vostre avantage, puis qu’ayant recognu mon peu de valeur, il fera beaucoup plus d’estime de vostre merite. Belle & courtoise bergere, respondit Alexis, j’aurois peur qu’il n’en avint au contraire. Puis, adjousta Stelle, que j’ay le courage d’entrer en cette preuve, il me semble que vous, Madame, qui avez tant d’avantage par dessus moy, n’en devez pas faire difficulté. Toutefois, reprit Alexis, quand Silvandre luy a demandé que c’est qu’il pourroit reprendre en moy, il y a trouvé du defaut, & de vous il n’a sceu que dire. C’est peut-estre, respondit la bergere, qu’il trouvoit trop de choses à desapreuver. Non, non, ajousta Alexis, c’est que l’Amour a de coustume de bouscher les yeux à ceux qui ayment bien. En fin, interrompit Hylas, en quoy se conclura tout ce long discours ? Alexis qui se contentoit des importunitez que l’affection d’Hylas luy avoit rapportées, l’empeschant bien souvent de parler, & de demeurer seule avec Astrée, & prevoyant qu’avec le temps elle pourroit encores l’incommoder d’avantage, elle pensa qu’il estoit bien temps de s’en défaire, mesme que la raison bien temps de s’en défaire, mesme que la raison qui le luy avoit faict souffrir, la pouvoit convier maintenant au contraire, car ç’avoit esté pour faire mieux croire qu’il fust fille : & cette opinion estant de sorte en l’ame de chacun, elle creut n’estre plus necessaire de souffrir cette contrainte : Et parce qu’elle demeura quelque temps à songer à toutes ces choses, & que l’humeur d’Hylas n’estoit pas d’avoir tant de patience : Ma maistresse, luy dit-il, ou resolution, ou congé. Mon serviteur, respondit Alexis, nous qui sommes Druydes, ne nous hastons pas tant que les autres personnes : car en toutes nos affaires avant que de les resoudre, nous consultons tousjours l’Oracle. Et quoy ma maistresse, reprit Hylas, vous ne faittes rien sans luy en demander congé ? Chose quelconque, dit-elle, De sorte, adjousta Hylas, que quand apres vous avoir servie longues années, ou pour le moins quelques Lunes, si pour recompense je vous demande un baiser, il faudra faire un sacrifice pour consulter l’Oracle. O mon serviteur, respondit en riant Alexis, nous ne demandons point ce congé à l’Oracle : car nous sçavons desja qu’il ne le veut pas. Comment, s’escria Hylas, apres un long service, il n’est pas seulement permis d’avoir le baiser d’une main ? Rien du tout, repliqua la Druyde : Et qu’est-ce donc, dit Hylas, que je dois esperer apres vous avoir longuement aymée & servie ? Le contentement, dit-elle, de m’avoir aymée. Je ne trouve pas, dit Hylas, que ce plaisir soit si grand, qu’il me puisse payer la despense qu’il faut que je fasse en ce voyage. Ah ! mon serviteur, dit la Druyde, je voy bien que vous m’allez eschapper, & que je ne vous tiens gueres plus. Vous n’avez jamais faict paroistre d’avoir tant de cognoissance, dit-il, qu’à ce que vous dites maintenant : car il est vray que s’il y a quelque courtoisie en vous pour les services que vous avez receus de moy, permettez que je vous baise ou la main ou la robe. Encores, respondit Alexis, que j’aye beaucoup de regret que vous me quittiez, & que les loix des Druydes soient en quelque sorte contraires à ce que vous me mandez, si ne veux-je point que le Gentil Hylas se separe d’avec moy, sans en avoir eu ce qu’il en a demandé : & pource je vous permets & ma main & ma robe. A ce mot, Hylas se jettant à genoux : Et moy, dit il, je reçois ceste faveur pour tesmoignage de l’estime que je fais d’Alexis comme de la plus parfaicte en qualité de Druyde qui fut jamais, & luy ayant baisé & la main & la robe, il s’en courut vers Stelle, à laquelle prenant la main, C’est à vous belle Bergere, dit-il, à qui je viens offrir toutes les faveurs qu’Amour m’a faict obtenir de toutes celles que j’ay aymées, & afin que vous ne croyez pas que j’en sois pau vre, recevez en premier lieu ces deux baisers que ceste belle Druide m’a donnez. Si les autres, interrompit Silvandre, ne sont pas plus grandes que celle-cy, je croy, Hylas, que tu n’as guere dequoy te vanter : Et quoy, respondit Hylas, tu n’estimes point la faveur qu’Alexis m’a faite ? J’estime, continua Silvandre, ce que la belle Alexis a fait pour toy, mais en qualité de rançon & non pas de faveur : Et qu’est-ce, reprit Hylas, que tu veux dire ? J’entends, continua Silvandre, que ceste sage & belle Druide, pour se rachepter de l’importunité qu’elle recoit de toy, a esté bien aise de te permettre de baiser sa main & sa robbe, comme pour sa rançon, & pour estre à l’advenir libre & exempte de ce qui la travailloit si fort : je serois bien trompé, dit Hylas, si tu disois vray, mais je sçay, Sylvandre, que dés long temps tu es mon ennemy, je ne veux donc point croire à tes paroles, non plus que je ne te conseille pas d’ajouster foy aux miennes, quand je diray quelque chose contre toy. Mais vous, ma maistresse, dit-il, s’adressant à Stelle, ne vous arrestez point aux discours de ce berger, autrement je suis asseuré que vous ne m’aimerez guere : Stelle qui n’estoit pas ignorante de l’humeur de Hylas, & qui toutefois ne la trouvoit point desagreable : Mon nouveau serviteur, luy dit-elle, je cognois de sorte Silvandre, qu’il ne faut pas que vous m’en disiez d’avantage : Mais, continua-t’elle, est-ce à bon escient que vous voulez estre mon serviteur ? Comment, reprit Hylas pensez vous que je sois dissimulé comme vos bergers de Lignon ? Non, non, ma maistresse, sçachez que j’ay le cœur dans la bouche, & que toutes mes paroles sont tres-veritables, & de fait, ne voyez vous que soudain que je n’ay plus aymé Alexis, je le luy ay dit. Je croiray de vous, continua la bergere, tout ce que vous m’en dites, & plus encores s’il s’en peut : mais puis qu’il est ainsi, je veux que de mesme vous en croyez autant de moy, & afin que nous vivions avec du contentement, je desire que nous fassions des conditions ensemble, lesquelles nous serons obligez d’observer, & que nous appellerons loix d’Amour : Et parce que je veux que vous puissiez vous en souvenir & moy aussi, il faut que nous les mettions par escrit, de sorte qu’avant que nous fassions l’entiere resolution de nous aymer, je suis d’advis que nous ayons du papier & une escritoire. Ma future maistresse, dit Hylas, c’est ainsi que vous voulez que je vous appelle, jusques à ce que nous ayons passé nos conditions par escrit : Je prevois tant de contentement de nostre future amitié, que je ne voudrois pas dilayer d’avantage, & si j’ay bonne memoire, il y doit avoir à ceste porte une escritoire, quant à du papier, j’en trouveray bien assez dans ma panetiere : Je vous supplie mettons la main à l’œuvre. Et à ce mot, il s’en courut à la porte du temple, où il trouva celuy avec lequel il avoit falsifié les loix d’Amour, & lequel il avoit retourné en sa place, lors qu’inutilement il l’estoit venu querir, pour escrire l’Epitaphe du vain tombeau de Celadon. Toute la troupe qui oyoit ceste nouvelle façon d’aimer, ne se pouvoit empescher de rire, & mouroit d’envie de voir quelles seroient leurs conditions, & cela fut cause que chacun chercha du papier, de peur qu’à faute d’en avoir, ils ne remissent la partie à une autre fois. Et en fin toutes choses estans prestes, Hylas dit qu’il vouloit estre celuy qui escriroit les conditions : Mais Stelle respondit, qu’il estoit plus raisonnable que ce fut elle, parce que ç’avoit esté elle qui avoit esté la premiere à les proposer. En fin apres une longue dispute, Hylas accorda qu’elle les dicteroit, pourveu qu’elle ne les fist point escrire qu’il n’y eust consenty article par article : Mais cela estant arresté, il fallut sçavoir qui les escriroit, parce qu’Hylas craignoit que Stelle n’en escrivist plus qu’elle n’en prononceroit, & Stelle au rebours, ayant peur qu’Hylas n’en escrivit moins, ils ne vouloient point se fier l’un à l’autre. Ceste dispute ne se pouvoit faire sans un extreme plaisir pour toute la compagnie. Et parce qu’Astrée voyoit que sa chere Druyde en rioit de bon cœur, elle dit à Silvandre, qu’il les pouvoit bien relever tous deux de ceste peine. Je le ferois, dit-il, belle Bergere, si la vraye & parfaicte affection que je porte à Diane, pouvoit souffrir que ma main peut escrire des choses si contraires à la fidelité & pureté de mon amour, & à la verité j’eslirois aussi tost la mort, que de permettre que l’on vit de semblables conditions avec l’escriture de Silvandre. Non, non, trop scrupuleux Amant, dit Hylas, ne t’excuse point de ceste peine, je t’en descharge fort librement : aussi la veritable amour qui doit estre entre ceste Bergere & moy, ne sçauroit supporter qu’une personne de si differente humeur, fut [sic] secretaire de ses ordonnances. Corillas qui avoit ouy tout ce discours, & qui desiroit infiniment de voir Hylas & Stelle liez ensemble d’affection, luy semblant que deux personnes plus semblables ne se pouvoient jamais assembler ; Donne moy, Hylas ceste charge, dit-il, & sois certain que je n’escriray que ce que tu accorderas : Et vous Stelle, vous n’en devez point faire de difficulté, puis que vous sçavez bien que j’entends assez vostre langage, pour ne vous faire pas redire deux fois un mesme mot. Et ayans tous deux consenty, prenant la plume & le papier, il s’assit en terre, & escrivit sur ses genoux les articles qui s’ensuivent, lors toutesfois que tous deux estoient bien d’accord.

Les douze conditions avec lesquelles Stelle & Hylas promettent de s’aymer à l’advenir.

L’experience estant celle qui rend les personnes prudentes, & qui apprend à mettre les remedes necessaires pour eviter les inconveniens, ou l’on a veu que les autres se sont auparavant perdus : nous ayant enseignez par les divers evenemens que nous avons remarquez entre ceux qui s’ayment, que le plus souvent toutes leurs amertumes & dissentions ne proviennent que de la Tyrannie que l’un veut exercer sur l’autre, Nous Stelle & Hylas sommes tombez d’accord de ce qui s’ensuit.

PREMIEREMENT.

Que l’un n’usurpera point sur l’autre ceste souveraine authorité, que nous disons estre Tyrannie.
Que chacun de nous sera en mesme temps, & l’Amant, & l’aymé, & l’aimée & l’Amante.
Que nostre amitié sera eternellement sans contrainte.
Que nous nous aymerons tant qu’il nous plaira.
Que celuy qui voudra cesser d’aymer, le pourra faire sans reproche d’aucune infidelité.
Que quand nous voudrons sans nous separer d’amitié, nous pourrons aymer qui bon nous semblera, & tant qu’il nous plaira continuer ceste amitié, ou la quitter sans congé.
Que la jalousie, les plaintes, & la tristesse seront bannies d’entre nous, comme incompatibles avec nostre parfaite amitié.
Qu’en nostre conversation nous serons libres, & sans nous contraindre, chacun fera & dira ce qu’il luy plaira, sans nous incommoder l’un pour l’autre.
Que pour n’estre point menteurs, ny esclaves en effect, ny en parole, tous ces mots de fidelité, de servitude & d’eternelle affection ne seront jamais meslez parmy nos discours.
Que nous pourrons tous deux ou l’un sans l’autre continuer ou cesser de nous entre aymer.
Que si ceste amitié cesse de l’un des costez, ou de tous les deux, nous pourrons la renouveller quand bon nous semblera.
Que pour ne nous abstraindre à une longue amour ou à une longue hayne, nous serons obligez d’oublier & les faveurs & les outrages.

Ces articles estans escrits de ceste sorte. Et bien, Hylas, luy dit Stelle, ces conditions vous sont-elles agreables ! Et à vous, respondit, Hylas ? Quant à moy, repliqua la bergere, je ne les eusse pas fait escrire, si elles ne m’eussent semblé tres-justes, & tres-raisonnables. Quant à moy, interrompit Silvandre, j’y en voudrois adjouster encore une : Et laquelle ? respondit Hylas : Que quand bon vous semblera, reprit Silvandre, vous n’observerez pas une de toutes celles que vous avez escrites, autrement vous contrevenez à vostre intention, car n’est elle de vous aymer sans contrainte ? Or si vous estes obligez d’observer ce que vous avez escrit, n’estes vous pas contraints à suivre ce qui est escrit ? Ma future maistresse, dit Hylas, apres y avoir un peu pensé, je croy que veritablement ce berger ne parle pas du tout sans raison : Et quoy, mon futur serviteur, dit Stelle, voudriez vous changer d’opinion pour l’advis que Silvandre vous donne ? Silvandre, dis-je, que vous publiez par tout vostre grand ennemy : La honte, respondit Hylas, par laquelle vous me voulez empescher de recevoir les conseils que je crois estre bons, n’a guere de puissance sur moy, y ayant fort long temps que l’une des principales maximes, que je tiens pour la conduite de ma vie, est celle-cy.

Qui voit son bien, & ne le veut,
A tort puis apres il se deult.

Et quant à ce que vous dites que Silvandre est mon ennemy, je le vous avouë : Mais y a t’il rien de pire qu’un serpent, & toutesfois ceux qui ont la cognoissance des proprietez de chasque chose, ne laissent de s’en servir en leurs receptes pour le salut des hommes : & les plus sages n’ont ils pas accoustumé de tirer beaucoup de profit de leurs propres ennemis ? Et par ainsi ne me dites plus si je veux changer d’opinion pour Silvandre : Mais voyons, si ce qu’il dit est bon ou mauvais. Quant à moy qui suis nourry dans une pure & entiere liberté, il me fascheroit fort que deux doigts de papier barboüillé, comme celuy que vous avez faict escrire, me peust astraindre à changer de vie : Et toutesfois il est certain que si nous lisons à ce qui est mis icy, nous nous obligeons à observer ces articles, & toute obligation est en effect une contrainte, si l’on n’y adjouste la condition que Silvandre nous a proposée. Quant à moy, reprit Stelle, je consents qu’elle soit adjoustée aux nostres, car ma liberté m’est aussi chere qu’à vous la vostre : Mais parce que je crains qu’il n’y ait quelque malice cachée sous ces paroles, qu’on y mette en l’escrivant, condition adjoustée par Silvandre. J’appelle de ce jugement, s’escria incontinent Silvandre, car je ne veux estre dans vos conditions, ny pour conseil ny pour tesmoing. Tu ne peux pas empescher dit Hylas, que par force tu ne sois tous les deux, puis que chacun voit que tu es tesmoing de ce que nous faisons, & que chacun a ouy que c’est par ton conseil, que nous adjoustons cette troisiesme condition à celles que nous avons desja accordées : & parce que toute cette trouppe fit une grande risée, & le bruict en vint jusques à Daphnide, & Alcidon, qui parloient avec le sage Adamas, ils sortirent par curiosité hors de ce temple champestre, aussi bien avoient ils desja visité les raretez de ce lieu. Et parce que les Bergers & Bergeres continuoient de rire, s’adressant à Silvandre qu’ils voyoient le plus de tous en action, Il leur respondit, Que Hylas, & Stelle luy vouloient faire un tort, qu’il supporteroit moins aysement que le trespas, & lors leur raconta tout ce qui s’estoit passé, & mesme leur fist voir les conditions escrites, & approuvées d’un costé & d’autre : & d’autant continua-t’il, qu’en me mocquant de cet te nouvelle façon de contracter amitié, je leur ay dit qu’il y falloit adjouster : Que quand bon leur sembleroit ils n’observeroient pas une de ces conditions, ils veulent joindre cet article au leur : Mais soubs le nom de Silvandre. Le Druyde, Daphnide & Alcidon, ne pouvoient se garder de rire, tant de voir ces gracieuses conditions, que de la colere de Silvandre, & de la honte qu’il avoit d’estre nommé en ce contract d’importance ; & d’autant que plus il en faisoit de refus, Hylas & Stelle s’opiniatroient d’avantage de l’y mettre : Adamas prenant la parole, Mes enfans, leur dit-il, voulez vous que j’ordonne sur vos differents ? Quant à moy, dit Hylas, j’y consents & pour Stelle & pour moy : Et moy, adjousta Silvandre, je n’y consents pas seulement, mais je l’en supplie & conjure. Dites-moy donc Hylas, reprit le Druide, pourquoy voulez vous que Silvandre soit mis pour tesmoing de vos conditions, & pour autheur de celle que vous y voulez adjouster ? Par ce, respondit Hylas, que j’ayme la verité, & que je ne suis point ingrat. Or la verité est, qu’il est tesmoing des conditions que Stelle & moy avons faites, & que nous ayant donné ce bon advis, nous serions ingrats si nous ne recognoissions de le tenir de luy. Et vous Silvandre, que respondez-vous au contraire ? dict Adamas. Je dis, adjousta Silvandre, qu’encores que je sois present, toutefois je ne veux pas estre tesmoing, & que par raison je n’y puis estre contrainct. Car le grand Tautates n’est-il pas par tout ? & toutesfois quand l’on faict quelque meschanceté, le prend-on pour tesmoing ? Et pourquoy, interrompit Hylas, ne seroit-il pas tesmoing ? Parce, dit-il, qu’il en doit estre juge, & chastier telles meschancetez : De mesme je ne puis pas estre tesmoing. Si ne seras-tu pas aussi nostre juge, reprit Hylas, car nous aurions assez de cause pour recuser ton jugement. Si je n’en suis le juge, continua Silvandre, j’en seray l’accusateur, ce que je ne pourrois pas estre si j’estois tesmoing. Et quant à l’ingratitude de laquelle il parle, elle seroit bien plus grande, s’il pense de m’avoir de l’obligation, en m’offençant si cruellement, que non pas en taisant mon nom, que je prendray au contraire, pour une tres-grande recompense. Alors le sage Druyde ayant quelque temps passé le temps à les faire disputer, ordonna de cette sorte : Mes enfans apres avoir meurement consideré vos differents : Je juge que ces conditions de vostre future amitié estans toutes pour conserver la liberté de laquelle vous pretendez jouyr, il ne seroit pas raisonnable, qu’elles l’ostassent à d’autres, ny qu’elles les obligeassent par force à choses contre leur volonté. Et pour ce de tous ceux qui sont presents, ceux-là en seront les tesmoings qui les voudront estre, & les accusateurs aussi qui en voudront prendre la peine. Et parce que vous jugez cet article estre digne d’estre adjousté aux autres que vous avez des-ja faict escrire, & que n’estant de vostre invention, vous ne voulez point vous en attribuer l’honneur, & que d’autre costé Silvandre n’y, veut pas estre nommé : j’ordonne qu’il sera escrit, mais de cette sorte.

Treiziesme & dernier article.

Adjousté par advis & conseil, aux conditions avec lesquelles Hylas & Stelle promettent de s’aymer à l’advenir : Et le quel ils jurent d’observer le plus religieusement.

Que toutefois nous Stelle & Hylas sommes si soigneux de nostre liberté, & tant ennemis de toutes sortes de contrainte, qu’il nous sera permis quand bon nous semblera, de n’observer une seule de toutes les conditions cy-dessus escrites & accordées.

Ainsi se termina le different de ces gentils bergers, avec le contentement de tous, par le sage advis du Druyde, non point sans plusieurs plaisans discours sur ce propos, & l’opinion que la pluspart eut que cette amitié seroit de durée, puis que l’une, ny l’autre des parties n’avoit dequoy se plaindre. Corilas les voyant ensemble, & se tenir par les mains, en signe de leur contentement : Or va, dit-il, Stelle, te voila arrivée où ton humeur te devoit avoir conduite il y a long-temps. Et toy, Hylas, tu peux dire qu’apres avoir longuement cherché, tu as trouvé ce qui t’estoit neces saire, & je recognois que veritablement le Ciel est juste, puis que parmy tant de divers evenemens il vous a non seulement conservé l’un pour l’autre, mais enfin vous a liez ensemble d’une mutuelle affection.

L’amitié de Hylas & de Stelle se commença de ceste sorte : Au commencement par jeu, mais enfin elle continua à bon escient, car Stelle estoit une fort agreable bergere, & qui avoit un esprit vif, & Hylas de son costé estoit de la plus douce compagnie qu’on peust imaginer, & leurs conditions estoient si favorables, & pour le serviteur & pour la maistresse, qu’il n’y avoit rien qui leur peust rapporter le moindre mescontentement, de sorte que peu à peu vivant avec ceste franchise, ils conceurent & l’un & l’autre une amitié plus grande qu’ils n’avoient pensé ny jamais ressenty pour quelque autre suject qui fut presenté devant leurs yeux.

Cependant le disner estant prest, & les tables dressées à l’ombrage du bois, & le plus pres de la fontaine que la commodité du lieu leur avoit permis, toute la trouppe s’assit. Il est vray que les Vacies, Bardes, Sarronides, Eubages, & Druydes, se mirent à une table separée, où ils mangerent ce qui leur appartenoit du sacrifice : Mais Adamas pour rendre plus d’honneur à Daphnide & à Alcidon, mangea d’un autre costé avec eux, & avec le reste des bergers & bergeres qui estoient restez en ce lieu. Tant que le repas dura, l’on ne parla que des raretez de ce lieu, & de la saincteté de ce bocage sacré. Mais le disner finy, & le soleil estant encores trop haut pour se pouvoir mettre en chemin, afin d’aller au grand Pré, où toute la troupe des bergers ou bergeres devoit se rendre, pour les jeux rustiques qu’on avoit accoustumé de faire apres les sacrifices : Adamas eut opinion que la chaleur du jour se passeroit plus aisement, aupres de la fraicheur de ceste fontaine, si l’on y pouvoit trouver quelque honneste divertissement, & se souvenant du jugement que Diane estoit obligée de faire sur la recherche de Silvandre & de Philis : Il pensa que le temps & l’occasion estoient tres à propos maintenant, & d’autant plus que Daphnide qui ne s’arrestoit en ceste contrée, que pour avoir plus de cognoissance de la douce vie des ces bergers & bergeres, seroit bien ayse d’ouir ce different, & le jugement que Diane en donneroit. Il vint donc trouver Astrée & Philis, & leur ayant fait entendre son dessein, il les pria de vouloir joindre leur credit avec ses prieres, pour faire que Diane y consentist. Je m’asseure, respondit Astrée, qu’il ne l’en faudra guere soliciter, car je sçay que ce qui la fait retarder si long temps, ç’a esté qu’il nous a semblé à toutes, qu’il n’estoit pas raisonnable que ce jugement se donnast hors de la presence de la Nymphe Leonide, puis qu’en ayant veu le commencement, il sembloit qu’elle deust aussi assister à la fin : Mais j’ay peur que si Silvandre s’en apperçoit, il ne nous rompe bien-tost compagnie. Philis qui veid bien que le Druyde le proposoit avec raison, & qui outre cela se faschoit d’employer le temps à quelque autre entretien, qu’à celuy de son bien-aymé Licidas, duquel il sembloit que les soings qu’elle rendoit à Diane, encore que feints, la divertissoient plus qu’elle n’eust desiré. Non, non ma sœur, dit-elle, il faut surprendre l’ennemy quand il y pense le moins, & haussant la voix, Ma maistresse, dit-elle à Diane, ceste compagnie vous demande, & je vous supplie de venir, sans vous arrester aux discours de celuy qui parle à vous : car je m’asseure qu’il ne vous dict rien à mon advantage. Silvandre estoit celui qui l’entretenoit, & qui pour ne perdre le moindre moment, ne laissoit aucune occasion d’entretenir Diane, si bien qu’ayant veu Paris un peu esloigné avec la Nymphe Leonide, il s’estoit approché d’elle, & ne faisoit presque que commencer lors que Philis l’interrompit : dequoy tout fasché, Je m’estonnois bien, dict-il, si ces deux mauvais demons qui me tourmentent continuellement, l’un pour le moins ne se trouvoit point icy pour interrompre mon bon-heur. Vostre bon-heur, respondit Philis, est tantost bien prés de sa fin, & le mien au contraire bien prés de sa supreme felicité : car ma Maistresse, continua-t’elle se tournant vers Diane, vous estes requise par ceste bonne compagnie, de juger le merite du service de Silvandre & de moy. Il est certain que Diane demeura un peu surprise : car encore qu’elle eust faict dessein de rendre ce jugement bien-tost, toutefois elle ne laissoit de prevoir ce qui luy pourroit arriver en la recherche de Silvandre, duquel elle jugeoit l’opiniastreté ne devoir ceder à la resolution qu’elle avoit de ne souffrir plus les declarations d’amitié qu’il luy souloit faire : Mais le berger le fut encore d’avantage, qui ne voyoit point de commodité pour eschapper ce jugement qu’il avoit si longuement dilayé, & lequel estant prononce luy raviroit le moyen de se servir de la feinte dont amour s’estoit couvert pour le rendre amoureux de cette bergere. Ces considerations leur osterent à tous deux la parole pour quelque temps, dequoy Philis s’appercevant : Et quoy, ma maistresse, dit-elle, vous ne respondez point, & semble qu’il vous fasche de me donner par vostre jugement la gloire que vous ne pouvez refuser à mes services, ou bien que peut-estre vous craignez de perdre ce berger, & d’estre exempte de ses importunitez ? Alors Diane pour ne donner cognoissance du trouble qui estoit en elle, en sousriant luy respondit, le ne sçay où vous fondez les grandes gloires que vous pretendez pour vos services, puis que m’estans reprochez en si bonne compagnie, quand ils seroient beaucoup plus remarquables, ils seroyent surpayez en les supportant comme je fais, ny pour quoy voulez-vous que ceux de Silvandre ayent le nom d’importunité, & non pas les vostres, qui procedent tous d’une mesme cause ? Silvandre mettant un genoüil en terre, & prenant la main de Diane la luy baisa pour remerciement d’une si juste & favorable response : & puis se relevant : Ma maistresse, luy dit-il, ceste bergere ne sçachant que c’est que d’aymer, & voyant bien que plus elle va continuant, & plus elle monstre les defauts de son affection, a pensé que celuy seroit avantage de voir finir une preuve en laquelle elle s’acquitte si mal. Car quelle autre occasion, continua-il se tournant vers Philis, vous pourroit convier de parler de cette sorte à nostre maistresse, puis que les services que vous luy reprochez sont si petits, que la gloire qu’ils meritent n’en peut estre gueres plus grande, &la crainte encore moindre que comme vous dites, elle doit avoir de me perdre, estant tres-asseurec que tant que je vivray elle ne se perdra jamais ? C’est ainsi, respondit Philis, que le soldat peu courageux fuit les occasions du peril : & au contraire, c’est comme moy que le vaillant Athlete recherche les plus dangereuses & perilleuses rencontres, afin de donner à chacun tesmoignage de ce qu’il vaut : car si ce n’estoit ce que je dis, pourquoy esloigneriez vous peureux soldat que vous estes, le hazard de ce jugement qui doit rendre preuve de l’avantage que nous avons l’un sur l’autre ? Et si Diane ne le va point retardant pour l’occasion que j’ay dite, quelle autre est-ce que vous & elle pourrez alleguer pour excuse ? Je crains respondit froidement Diane, que nos rustiques discours ne rapportent beaucoup d’importunité à cette assemblée, & mesme à la belle Daphnide & à Alcidon, qui ne treuveront que fort maigres nos petits passe-temps de village, estans accoustumez à des subjets plus hauts & plus relevez : Et parce qu’elle vouloit continuer en ses excuses : Vous vous trompez, discrete Bergere dit Adamas, Daphnide & Alcidon sont maintenant des bergers de Lignon, puis qu’ils en ont pris l’habit d’autant qu’ils sçavent bien que la grandeur du personnage que chacun faict, n’est pas ce qui le rend estimable par dessus les autres, mais de se sçavoir bien acquitter de celuy que nous voulons representer : & par ainsi nous devons croire que comme cette belle Dame, & ce gentil Chevalier ont bien sceu faire le personnage de belle Dame, & de vaillant Chevalier, tant qu’ils en ont porté le nom, de mesme maintenant qu’ils sont revestus des habits de berger & de bergere, ils ne s’en acquiteront pas avec moins de perfection, pliant leur esprit aux douces naifvetez des Pasteurs, & à leurs innocens exercices, & la croyance que j’en ay eu, m’a convié de faire cette proposition à Philis, afin que par vostre jugement ce nouveau berger & belle bergere apprissent quels sont les entretiens de vos hameaux, & cela d’autant plus que l’ardeur du Soleil estant trop grande pour nous en aller au grand pré où les bergers doivent faire les exercices accoustumez apres le sacrifice, nous ne sçaurions employer mieux le temps, qu’à voir mettre fin au different de Silvandre, & de Philis : & apres nous pourrons estre encore à temps pour voir l’assemblée des jeunes bergers & bergeres. Je sçay mon pere, respondit Diane, que tout ce qui vient de vous, ne sçauroit estre qu’avec beaucoup de raison, & que nous sommes obligés d’observer tout ce que vous nous ordonnez, c’est pourquoy je ne mettray jamais difficulté en tout ce qu’il vous plaira : mais en cecy je supplieray seulement Daphnide & Alcidon, qu’escoutant nos petits jeux, ils en reçoivent la simplicité pour l’ornement des leurs, & que si nous osons les leur faire voir ils l’attribuent à l’obeissance que nous vous voulons rendre. Belle bergere, respondit Daphnide, si toutes les autres contrées de la Gaule produisoient de semblables bergeres que celles de Forests, je croirois que les vieilles [sic] auroient bien dequoy porter envie aux villages & aux bois : & vous ne devez point faire de difficulté de nous donner part en vos passe-temps, puis que jusques icy tout ce que nous en avons veu, ne nous a rapporté que beaucoup de contentement, & causé beaucoup d’admiration.

Cependant le sage Druyde avoit commandé que l’on disposast les sieges en rond, & qu’il y en eust un pour Diane un peu relevé, & appuyé contre le dos d’un arbre, de qui le fueillage espais faisoit tout à l’entour un ombrage gracieux, & lors que tout fut en l’estat qu’il desiroit, se faisant apporter trois Guirlandes de diverses fleurs, qui avoient esté cueillies dans le pré sacré, il en mit une sur la teste de Diane, & de mesme sur celle de Philis & de Silvandre, & puis prenant Diane par la main la mit en son siege, & au devant d’elle à main droite, mais un peu esloignée, la bergere Philis & Silvandre au costé gauche, & tout le reste en rond, ayant mis les sieges de telle sorte, que l’un n’empeschoit point l’autre, mais faisoient comme une parfaite couronne, qui commençoit & finissoit où estoit Diane, & apres avoir prié qu’on fit silence, il ordonna à Leonide de faire entendre à ces bergeres estrangeres, le commencement de la dispute de Philis & de Silvandre, afin qu’elles pussent mieux juger de leur different, estant bien raisonnable qu’elle en racontast le subject, puis qu’en partie elle en avoit esté cause. Leonide qui n’avoit point pensé devoir faire en ceste assemblée autre personnage que celui d’escouter, fut un peu surprise d’en avoir un autre, toutefois pour obeïr au Druyde, apres y avoir un peu pensé, elle prit la parole de ceste sorte, se tournant vers Daphnide.

Peut estre, Madame, aurez vous remarqué, que Silvandre & Philis nomme Diane leur maistresse, & qu’ils la servent, & luy rendent les devoirs ausquels la beauté & les merites de ceste bergere peuvent obliger tous les bergers qui la voyent, & encores que je sçache asseurément, que vous n’aurez point trouvé estrange que ce jeune berger, ayant l’esprit & le jugement que vous luy avez recogneu, ayme & serve une si belle & aymable bergere que Diane, je veux croire que vous ne serez pas demeurée sans estonnement, de voir que Philis qui est bergere, la serve comme si elle estoit un berger, & use envers elle des mesmes paroles, & des mesmes actions, que les plus ardantes passions peuvent faire produire dans le cœur d’un amant le plus affectionné. Parce que ce n’est pas la coustume de voir une fille servir avec de semblables soings une autre fille, mais afin que vous sortiez de cest estonnement, il faut que vous sçachies que Silvandre, tel que vous le voyez, avoit vescu parmy toutes ces belles & jeunes bergeres, si longuement sans en aymer pas une, qu’il s’estoit acquis le nom D’INSENSIBLE, n’y ayant personne qui le peust croire avoir du sentiment, & n’espreuver point la force de ces jeunes beautez. Et parce que quelques uns s’en estonnoient, & que plusieurs l’admiroient : Philis comme l’une de celles qui ne se pouvoient imaginer qu’il n’y eust quelque deffaut en ce gentil berger, qui estant, & jeune & beau, & vivant parmy tant de bergeres qui meritoient bien d’estre aymées, toutesfois estoit insensible, & ne se pouvoit eschauffer à tant de feux : Le rencontrant de fortune parmy ses compagnes, ne peut s’empescher de venir aux douces reproches avec luy, feignant de croire, que s’il n’entreprenoit point d’en servir quelqu’une, c’estoit faute de courage, ou pour recognoistre son peu de merite : & parce que le berger qui n’avoit ses pensées qu’au plaisir de la chasse, & qu’au soing de ses troupeaux, soustenoit le contraire, & que c’estoit pour avoir des meilleures & de plus douces occupations : Il fut condamné par Astrée, Diane, & moy qui nous y trouvasmes, de donner cognoissance, que si jusques en ce temps-là il n’avoit rien aymé, ç’avoit esté pour les occasions qu’il avoit alleguées, & non point pour celles que Philis luy reprochoit. Et Diane luy ayant esté proposée comme bergere, à qui la beauté ne manquoit point pour estre aymée, ny le jugement pour sçavoir cognoistre son merite, il commença de la servir, & rechercher tout ainsi que s’il en eus testé bien amoureux. Mais Philis ne s’en alla pas exempte aussi de la mesme peine, parce qu’à la requeste de Silvandre, elle fut en mesme temps condamnée d’aymer & de servir Diane, avec les mesmes devoirs & les mesmes soings que les bergers ont accoustumé de rechercher celles desquelles ils sont amoureux passionnez, afin que trois Lunes estans escoulées en ceste recherche, Diane peust juger qui des deux se sçauroit mieux faire aymer. Or depuis, ceste honneste emulation a esté en ce berger & ceste bergere, de telle sorte, qu’ils n’y ont oublié ny la peine, ny le soing de la plus ardante & veritable affection, & quoy que le terme fust prefix de trois Lunes dans lesquelles cest essay se devoit faire par eux, & juger par Diane, si est-ce qu’il a bien continué d’avantage, d’autant qu’il sembloit estre bien raisonnable, que comme j’avois esté des premieres à les condamner de rendre ce tesmoignage de leur merite, je me trouvasse aussi au jugement qui en seroit fait par Diane. Et ceste occasion ne s’estant rencontrée depuis que les trois Lunes ont esté passées, ils ont prolongé jusques à ceste heure qu’il semble que le ciel a reservé ce jugement, afin qu’avec plus de solemnité il fust donné en vostre presence.

La Nymphe Leonide finit de ceste sorte : Et Daphnide prenant la parole, l’avouë, dit-elle, se tournant vers Adamas, que ce n’a point esté sans estonnement, que j’ay veu ces jours passez Philis rechercher ceste belle Diane avec des paroles d’homme, mais maintenant changeant cét estonnement en admiration, il faut que je die, n’avoir jamais envié le bon-heur de personne que le vostre : Je veux dire, mon pere, que le ciel vous ait esloigné de ces troubles & inquietudes des affaires du monde, pour vous faire vivre parmy la douceur & la tranquilité de ceste vie : Heureux veritablement vous pouvez vous dire, d’estre nay en Forests : Heureux d’y estre obey & aymé comme grand Druyde, mais je vous dis encores plus heureux d’estre voisin de ces agreables rivages de Lignon, où le ciel a voulu faire naistre les plus gentils bergers & les plus belles & discrettes bergeres, qui ayent jamais porté ce nom. Madame, respondit Adamas, j’accorde tout ce que vous dites, & vous proteste que je ne changerois pas mon bon-heur à celuy du plus grand Monarque de la terre, n’ayant à supplier le grand Tautates, sinon qu’il nous le continuë à longues années : Mais pour les loüanges que vous donnez à nos bergers & discrettes bergeres, je m’asseure qu’ils ne les recevront pas sans rougir, encores qu’ils l’ayent bien agreable venant de vostre bouche : Et toute la trouppe se levant & faisant la reverence à Daphnide, pour approuver ce que le Druyde avoit dit, Mais, Madame, dit-il, puis que vous avez sçeu le subject de la recherche de Silvandre & de Philis, ne vous plaist-il pas d’en ouyr le jugement qui en sera fait ? Ce seroit, respondit Daphnide, me laisser avec un grand desir, que de me priver de ce contentement, & je vous supplie, mon pere, d’ordonner qu’ils continuent & que nous en voyons la fin. Le Druyde alors se tournant vers Philis, Ce fut vous bergere, dit-il, qui fustes la premiere à provoquer Silvandre au combat, il est raisonnable aussi, que vous soyez la premiere à dire les raisons, par lesquelles vous devez avoir la victoire. Alors Philis ayant fait une grande reverence à Diane & au reste de la compagnie sans se r’asseoir commença de parler de ceste sorte.

HARANGUE
de la Bergere Philis.

Je n’eusse jamais pensé, ma maistresse, que parmy les Bergeres de ceste contrée, & particulierement entre ceux qui paissent leurs troupeaux le long des rives de Lignon, ils en trouvast quelqu’un si remply de vanité, qu’il se peust estimer digne d’estre estimé, & mesme d’une bergere si pleine de merite que Diane, Diane, dis-je, la plus accomplie & la plus parfaite non seulement de toutes celles qui ont porté la houlette, & conduit les troupeaux, mais encore de toutes celles qui jamais ont eu le beau nom de Diane, me semblant que la simplicité de leur ame n’a point encore conçeu une presomption si difforme, n’y qu’un monstre si arrogant n’a point jusques icy esté recogneu parmy nous. Toutesfois vous le voyez devant vos yeux, ma belle maistresse, non seulement avec un cœur & un visage plein d’Amour, mais la teste couverte de chapeaux de fleurs, comme si desja il avoit emporté la victoire qu’injustement il pretend. Mais, berger, dy moy je te supplie : d’où vient cette temeraire presomption ? & par quelle pretenduë raison l’as-tu peu concevoir ? Tes merites au moins n’ont pas donné naissance à ceste esperance si peu raisonnable lors que tu as consideré les perfections de Diane, puis qu’elles sont telles, que n’y ayant point de proportion entre ce qu’elle merite, & ce que tu vaux, l’amour ne peut estre produite par des choses tant inesgales. Je m’asseure que l’outrecuidance qui est en toy, ne sera pas si grande qu’elle te face nier ce que je dis, & qu’en ton ame tu ne m’avouës qu’il n’y a rien qui puisse égaler les perfections de nostre maistresse : Et comment arrogant & temeraire Ixion oses tu l’aymer ? & de plus comment as-tu la hardiesse de penser qu’elle te puisse quelquefois aymer ceste belle & si belle Diane, que les yeux ne la doivent regarder que pour l’idolatrer ? Mais si ceste outrecuidance est grande en ce berger, l’autre que j’en vay dire, est bien ce me semble encores plus extreme. Parce que la beauté ayant des attraits si violens il est certain que bien souvent elle clost les yeux à celuy qui en est touché, & l’empesche de prendre garde à son devoir & fait passer ses desirs beaucoup plus outre qu’il n’est raisonnable. Mais Silvandre, quelle excuse peux tu apporter qui soit bonne en la pretention que tu as, de devoir estre plus aymé d’elle que moy ? Puis que quand je n’aurois aucun advantage par dessus ce que tu peux valoir, encores ne me sçaurois-tu nier, que chacun naturellement ne soit incliné à aymer son semblable, & moy estant fille comme nostre maistresse, il est certain que naturellement elle me doit aimer davantage. Mais outre cela, qu’est-ce qui peut mieux faire naistre l’Amour, que la longue & ordinaire pratique ? c’est par elle que les perfections sont mieux recognuës, c’est par elle que les me rites estans recognus, l’amour va jettant ses racines plus profondes, & c’est par elle que les occasions se presentent à chasque moment de se rendre les reciproques devoirs, qui sont les veritables nourrices d’une parfaite & entiere affection. Or que je n’aye ceste ordinaire conversation avec elle, & que je ne l’aye eüe de tout temps plus particuliere que toy, malaisément le pourras-tu nier, puis qu’elle mesme le sçait, & qu’elle te pourra à l’heure mesme convaincre de mensonge. Mais outre toutes ces raisons, je t’en vay dire une qui te doit clorre la bouche, si pour le moins l’outrecuidance t’a laissé encores quelque partie de l’entendement que tu soulois avoir. Ne m’avouëras-tu pas, que ce qui est de plus beau & de plus parfait, est aussi plus aymable & plus estimable ? Te voicy, berger pris en un fascheux destroit : si tu l’avouës, ta cause est perduë, & si tu le nies, quelle offence ne fais-tu pas à nostre maistresse ? car nostre sexe estant infiniment plus parfait que celuy des hommes, il faut qu’en ceste qualité tu me cedes, & que tu confesses que j’ay cet advantage par-dessus toy, & pour lequel je dois estre plus aymée. Que quand toutes ces choses ne seroient point, n’est-il pas vray, Silvandre, que les desguisemens, les feintes, & les dissimulations recogneuës, ne sont jamais cause de faire naistre l’amour ? Et toutefois pense tu que cette belle Diane ne sçache asseurement que toutes ces recherches que tu luy fais, tous ces devoirs que tu luy rends, & bref toute ceste affection que tu t’efforces de luy faire paroistre, ne sont que pour la gageure que nous avons faite, & ne procedent que du desir que tu as de me vaincre, & non pas des perfections ny de son beau visage, ny de son bel esprit. Il me semble que je t’ois desja respondre, que cela est vray, mais que ceste raison est de mesme contre moy, puis que la gageure estant reciproque, toutes les demonstrations que je luy fais de mon affection, peuvent avoir le mesme defaut & le mesme blasme. O berger que tu te trompes ! puis que long temps avant que nostre dispute fust commencée, je l’aymois veritablement, & je sçay que de mesme j’estois aymée d’elle, ce qui ne se peut dire de toy, qui ne fais que de venir parmy nous, & n’as jamais tourné les yeux sur bergere quelconque pour l’aymer, tant s’en faut que tu ayes osé regarder celle-cy. Mais dy la verité, Silvandre, ne confesseras tu pas, qu’avant cette gageure, à peine eusses tu peu discerner le visage de Diane d’avec le mien, ou de quelque autre que ce fust des bergeres de Lignon ? Et ne penses-tu point que ces extremes passions que tu presentes en tes discours, ces trespas, ces languissemens, ces transports, & bref toutes tes folies, ou plustost déguisemens, ne la convient point aussi tost à rire qu’à aymer ? Le voila, ma maistresse, ce transi d’Amour, le voila cét idolatre de vos beautez, qui brusle en ses discours, & meurt pour avoir trop d’affection, c’est celuy-là mesme qui un moment avant nostre gageure, ne sçavoit presque si vous viviez, ou qui pour le moins n’avoit guere plus grande cognoissance de vous, que vostre nom luy en donnoit : Et toutesfois vous l’avez veu en mesme instant bruslant d’amour, quoy bruslant ? mais desja en cendre, voire consumé entierement ; ne faut-il pas plustost rire de ceste folie, qu’admirer son affection, ou s’il y a lieu d’admiration en cecy, ne faut-il pas plustost admirer l’asseurance avec laquelle il parle de cette amour, & de laquelle il fait tant de plainte, que de compatir avec luy à ses peines imaginaires ? Mais confessons luy encores qu’il y ait quelque estincelle de vostre beauté, qui pour s’en estre trop approché l’ait veritablement un peu attaint, & que par ce moyen il soit en quelque sorte à vous, n’est-il pas vray que c’est moy qui en dois avoir toute la recompense, puis que c’est moy qui en suis la seule cause ? Je puis dire avec verité, & vous le sçavez ma belle maistresse, que sans mes reproches, cette gageure ne se fust jamais faicte, & ne se faisant pas, eust-il eu ny la volonté ny la hardiesse de vous regarder ? Si donc il veut pretendre quelque grace de vous pour les services que depuis il vous a rendus : n’est-ce pas à moy à qui elle se doit faire, puis que je le vous ay donné tel qu’il est ? C’est donc moy, qui avec raison dois pretendre tout ce qu’il vaut, & qu’il merite, & quand il n’y auroit autre occasion pour me donner cette victoire qu’il me debat, je le devrois obtenir par celle-cy, puis que tous les devoirs, tous les soings, & toutes les actions qui le vous peuvent rendre aymable, doivent estre mis en mon conte, & à mon avantage. Cesse, donc berger de disputer avec moy une chose que tu cognois bien m’estre deuë, & devançant le jugement que tu ne peux eviter, consens que la gloi re me soit donnée, que ma fortune, ma condition & mes merites m’ont acquise par-dessus toy : si tu le fais, l’on cognoistra que tu ne t’es mis en cette entreprise que pour passe-temps, & ton esprit & ton jugement paroistront en cette action, & seront jugez de tous pour tres-estimables. Ton esprit, d’avoir sçeu si bien déguiser une fausse affection soubs les actions & le visage d’une veritable amour : & ton jugement, d’avoir sçeu si bien cognoistre l’advantage que j’ay par dessus toy : que si tu ne le fais, tu ne prolongeras point davantage le terme du chastiment de ton arrogance, qu’autant que tu retarderas par la longueur de ta response, le jugement que nostre maistresse en fera : & parce que je ne sçay en quelle humeur tu es, afin d’estre bonne mesnagere du temps, & pour haster d’autant plus la gloire qui m’est preparée, je laisseray tant d’autres raisons que je pourrois alleguer, & les remetray toutes au bel esprit de nostre maistresse, m’asseurant & qu’elle les sçaura mieux penser que je ne le sçaurois dire, & que tout ce que je sçaurois ajouster seroit desormais superflu, puis que desja la justice de mes infaillibles pretentions est si claire, qu’il n’y a rien qui luy puisse apporter plus de lumiere : seulement ma maistresse je vous supplie de vous souvenir, que non seulement Silvandre est hayssable en ses feintes : mais qu’ayant sceu si bien desguiser une menteuse affection, il a rendu tous les hommes mesprisables, ou pour le moins leurs recherches & leurs affections, nous ayant apris par la preuve qu’il en a faicte, qu’il n’y a ny foy ny verité parmy eux. Et ayant commis une si grande faute, n’est il pas bien raisonnable qu’il vous ressente juge severe, mais juste, puis qu’il ne merite pas de vous avoir pour maistresse favorable n’ayant que des feintes & des dissimulations ? A ce mot, Philis ayant fait une grande reverence à Diane & au reste de la compagnie, ne voulant rien dire d’avantage, s’assit, non pas toutesfois sans regarder d’un œil sousriant Silvandre, qui estoit tout esmeu des discours qu’elle avoit tenus contre luy, & qui toutefois dissimulant le mieux qu’il pouvoit, & ayant receu le commandement de parler s’en alla mettre à genoux devant Diane, où posant son chappeau de fleurs à ses pieds, s’en revint en sa place, & sans se r’assoir, apres avoir quelque temps tenu les yeux sur toute la troupe, il commença de parler de cette sorte.

RESPONSE
DU BERGER SILVANDRE.

Si je n’estois devant le Temple d’Astrée, que ceux qui nous en ont donné la cognoissance nous ont fait entendre estre la Déesse de la justice : & si j’avois un moindre juge que Diane, non seulement compagne, mais la plus chere & plus particuliere amie d’une autre Astrée, j’aurois tres-grande occasion de craindre la perte de cette cause, & d’en redouter le prochain jugement non pas tant pour les paroles si bien fardées de cette bergere, ny pour toutes les raisons desguisées qu’elle a voulu rapporter contre moy, quoy qu’avec un artifice tres-grand, que pour me recognoistre deffaillant en la plus forte & principale raison qui me seroit bien necessaire : car le different duquel nous disputons est fondé sur ce seul poinct : A scavoir, qui de nous deux se sçaura mieux faire aymer à cette belle Diane que nous avons eslevé pour le centre, où tous nos services & toutes nos affections doivent tendre : Voila le poinct que nous allons cherchant, & qui est si malaisé d’estre approché, que je le tiens presque impossible, s’il ne plaist au grand Tautates, de se monstrer aussi bien Tharamis en purifiant de sorte mon Amour, & la nettoyant si bien de toute imperfection qu’elle puisse meriter d’estre offerte à cette belle Diane : qu’il s’est faict paroistre Hesus, c’est-à-dire puissant, en la rendant si belle & si parfaicte, qu’il n’y a rien parmi les mortels qui puisse égaler ny sa beauté, ny sa perfection.

Peut estre vous pourriez-vous estonner, ma Maistresse, qu’estant en ce lieu si sainct, & dedié à la Déesse de la justice, & en la presence de la plus chere & familiere amie d’une juste Astrée, j’ose pretendre un favorable jugement, puis que j’avoüe que cette raison principale & plus necessaire me deffaut : Mais oyez, s’il vous plaist mon juge, sur quoy je fonde ma juste pretension. Le propre de la justice n’est pas seulement de juger rigoureusement selon les loix qui nous sont données, mais apres avoir consideré la veritable puissance de chasque chose, establir avec equité la loy naturelle, que celui qui faict tout ce qu’il peut, n’est obligé à rien d’avantage, & que s’il ne parvient jusques où il seroit necessaire, l’on ne doit pas le lui imputer à quelque faute ou manquement : mais l’attribuer aux ordonnances de la nature, qui s’est pleuë de les establir de cette sorte : & tant s’en faut qu’il soit blasmable pour ce manquement, qu’il est grandement à estimer d’estre parvenu jusques au poinct que nul autre de son espece ne peut outrepasser, & où il y en a fort peu qui puissent arriver. Si ce poinct m’est accordé, que je croy ma belle Maistresse ne me pouvoir estre mis en doute, pourquoy feray-je difficulté de me presenter au Trone de cette juste amie d’Astrée, encores que je ne puisse attaindre à la perfection que la beauté de Diane demande pour estre dignement aymée, puis que mon affection est veritablement parvenuë jusques au terme où jamais autre n’arriva, & que jamais Amant n’outrepassera ?

Pourquoy donc injurieuse Philis, pensant favoriser & fortifier vos foibles & mal-fondées pretensions, me blasmez-vous sans raison, puis que si je ne puis aymer avec plus de perfection celles que j’avouë, & que je recognois trop bien en Diane : ce n’est pas ma faute, mais de la nature qui ne m’a voulu donner ny plus d’esprit, ny plus de capacité, & de laquelle toutefois je ne puis me plaindre, puis que c’est une loy commune à tous les mortels, si ce n’est que comme mes yeux & mes desirs se sont eslevez à un subject qui surpasse en merites toutes les œuvres de ses mains, il semble qu’il eust esté raisonnable qu’elle m’eust aussi donné plus de puissance d’aymer, & plus de capacité pour le pouvoir faire plus dignement. Mais cette sage nature ne l’ayant voulu de cette sorte, il faut croire que ç’a esté pour quelque grande raison, & peut estre pour monstrer plus clairement la tres-grande beauté de Diane, qui me contraignant de l’aymer, action à la verité qui est par-dessus ce que les hommes peuvent, & contre cette regle d’esgalité que vous proposez Philis devoit estre entre ceux à qui il est permis de s’entre-aymer, fait voir sa grandeur par les effects, puis que la force doit estre tres-grande, qui esleve quelque chose par-dessus les loix que la Nature luy a imposées.

Doncques, bergere, si vous n’estes jalouse de la gloire de Diane, vous ne devez point trouver mauvais que je l’ayme, ny m’accuser d’arrogance, puis que c’est la force de sa beauté qui m’y contraint, & qu’en cela la grandeur de ses perfections se faict mieux cognoistre à tous ceux qui me voyent : & ne me demandez plus, je vous supplie, comment je l’ose aymer : J’avouë que j’en suis aussi ignorant que vous : mais cette ignorance ne m’empesche pas que je ne sois le plus perdu d’amour que tous ceux qui ont jamais aymé. Et quand vous me dictes que cette Diane est telle, que les yeux ne doivent la regarder que pour l’idolatrer, pourquoy ne dictes-vous Adorer, puis que s’il y a quelque chose en terre, qui pour ses perfections merite les autels & les sacrifices, je croy que c’est cette Diane que je n’idolatre pas comme vous, mais que j’adore pour la vraye Diane en terre, qui esclaire dans le Ciel, & qui commande dans les Enfers.

Mais quand vous me demandez, d’où vient la temeraire pretention que j’ay d’estre aymé d’elle, & qu’en cela vous me nommez Monstre d’arrogance & de presomption : vous faictes bien paroistre que vous sçavez fort peu que c’est que l’Amour, ny quels sont les effects qu’il produit en ceux qui le recognoissent. Vous m’avez cent fois avoüé que l’Amour est de soy-mesme bon, & je ne pense pas que vous veüillez maintenant dire le contraire, vostre silence me fait croire que vous y consentez, & à la verité, ce seroit autrement contrevenir au jugement de tous ceux qui en ont parlé avec raison : Car si rien ne peut produire que son semblable, Amour procedant de la cognoissance du bon & du beau, ne peut estre aussi que fort bon, & fort beau : Mais ce qui est bon & beau, ne peut-il estre veu & cogneu sans estre aymé ? Je ne vous estime pas si hors de raison, que vous le veüillez dire, mais quand cela seroit, je vous convaincrois par les mesmes paroles que vous venez de dire : Et en voicy les mesmes mots. La beauté, dictes-vous, a des traits si violents, que bien souvent elle clost les yeux à ceux qui la voyent, & fait passer leurs desirs beaucoup plus outre qu’il n’est raisonnable. Si donc ce qui est beau & bon, ne peut estre veu sans estre aymé, & si l’Amour est beau & bon, pourquoy appellez vous en moy arrogance, ce qui est raisonnable en tout autre ? Disant, que c’est une te meraire pretention que celle que j’ay, aymant ceste belle, de pouvoir estre aymé d’elle, puis que si elle cognoist mon Amour, & l’Amour estant bon, comment voulez vous qu’elle recognoisse en moy ce qui est bon sans l’aymer ? Ce seroit un defaut en elle de jugement, lequel je ne pense pas que personne que vous luy puisse reprocher. Avouez donc, Philis, si vous ne voulez l’outrager grandement, que cognoissant l’Amour que je luy porte, elle l’ayme, & que ma pretention n’est point outrecuidée, ny moy un monstre si difforme que vous me despeignez. Que si vous m’opposez que ceste raison ne preuve pas qu’elle m’ayme, mais seulement l’Amour que je luy porte : Je vous responds, bergere, que cette Amour que sa beauté a produit en moy, est un accident inseparable de mon ame, de telle sorte que l’un ne peut subsister sans l’autre, & quand je dirois qu’ils sont tellement changez l’un en l’autre, que mon ame est ceste Amour, & cette Amour est mon ame, je dirois une verité tres-certaine. Car il n’est pas plus vray que je vis avec cette ame qui me donne la vie, qu’il est asseuré que je ne sçaurois vivre sans cette Amour que je luy porte. Que si vous repliquez, que quand cela me seroit accordé, toutefois il ne s’ensuivroit pas que cette belle Diane me deust aymer, parce que peut-estre elle n’y pas encore veu, ny cogneu ceste Amour. Je vous respondray, bergere, que je croy bien qu’elle n’en a pas veritablement encores recogneu la grandeur, ou plustost l’extreme immensité, car ce n’est ainsi qu’il faut nommer ceste affection, avec laquelle j’ayme, ou plustost j’adore ma maistresse, parce qu’il n’y a point d’assez grands services, ny d’assez grandes demonstrations, pour la pouvoir faire recognoistre entierement : Mais je ne puis douter que ce bel esprit qui est en elle, n’en ayt clairement remarqué & cogneu une grande partie, puis que si mes actions ne l’ont peu si bien faire que je l’eusse desiré, vos reproches & vos parolles m’y ont aydé quelquefois, sans que vous y ayez pensé : &mesme en la presence de toute cette honorable assemblée, vous luy venez de dire que je me presente devant elle, avec un cœur & un visage plein d’Amour. Les tesmoignages que nostre ennemy rend de nous, quand ils nous sont advantageux, sont bien plus croyables que ceux que les personnes indifferentes rapportent. De sorte que ma belle maistresse ne doubtera nullement, que quand vous direz que j’ay le cœur plein d’Amour, & qu’à tous propos vous la nommerez nostre maistresse, cela ne soit tres-veritable, puis que c’est un tesmoignage que je n’ay point mandié, & qui par consequent ne luy peut estre suspect.

Et ne faut que pour fuir la rigueur de l’equité qui est en elle, recognoissant le peu de raison que vous avez de debattre cette gloire avec moy, vous recouriez aux faveurs que la nature vous a faictes, alleguant que comme fille, elle doit plustost aymer une fille qu’un berger, & qu’en cette qualité vous avez de l’advantage par dessus moy : Car au contraire, il est bien plus naturel à une fille d’aymer un berger, que non pas une autre fille comme elle : & d’effect si nous voulons rechercher les loix que la Nature nous donne, nous les trouverons tousjours exactement observées parmy les animaux, qui n’usent pour leur conservation que de ces seules ordonnances. Que si nous voulons considerer ce qu’ils font, avec qui est-ce que la Genice contracte amitié ? choisit-elle dans tout le troupeau une autre Genice comme elle, pour belle qu’elle puisse estre ? La Colombe s’allie-t’elle avec une autre Colombe ? Mais la Tourterelle, de qui regrette-t’elle la perte d’un eternel veufvage ? n’est-ce pas de celuy à qui dés le commencement elle s’est appariée ? vous le sçavez, Philis, aussi-bien que moy, & l’experience ordinaire vous empesche d’en douter : Mais les choses plus insensibles n’observent-elles pas ceste loy de nature ? La palme peut-elle estre contente qu’elle ne soit aupres du Palmier ? & si elle en est esloignée, d’autant qu’elle est attachée par les racines, & qu’elle ne peut s’en approcher, on la voit pancher a ses branches & tout le tronc du costé où il est, & où elle voudroit bien aller, s’il estoit permis. Ce n’est donc pas ô Philis, par les loix de la nature, comme vous dites, que Diane vous doit aymer plus que moy, car si elles les vouloit suivre, elle ne trourneroit pas seulement les yeux de vostre costé : Que si toutefois vous voulez qu’il soit ainsi, je vous accorde, bergere, qu’elle vous ayme comme fille, mais consentez aussi qu’elle m’ayme comme son serviteur : Vous ne pouvez pas y contredire, car il n’est pas plus vray que vous estes fille, qu’il est tres-certain que je suis son serviteur, ny il n’est pas plus naturel qu’une fille ayme une fille, que chacun ayme celuy qui l’ayme, par ainsi & vous & moy aurons obtenu ce que nous demandons : mais je voy bien que maintenant vous changerez d’opinion, & que sans plus recourre à ceste amitié naturelle, puis qu’elle ne peut estre à vostre advantage, vous rechercherez celle qui vient de l’eslection. Et d’effect voila qu’incontinent vous dites qu’elle vous doit aymer plus que moy, parce que l’ordinaire conversation que vous avez avec elle, plus estroicte que je n’ay pas, augmente l’Amour, soit parce que les perfections de la personne aymée sont mieux recogneuës, soit d’autant que l’on a plus de commodité de se rendre ces devoirs mutuels, qui conservent & augmentent l’Amour.

Mais, Philis, ny mesme par cette voye vous ne parviendrez à ce que vous pretendez, car elle vous en esloigne encore plus que l’autre, d’autant que par la premiere raison, vous pouvez peut-estre demander son amitié comme estant fille, mais par celle-cy, vous courez fortune de rencontrer la haine au lieu de l’Amour. Il est vray bergere, que la pratique d’une personne aimable, le fait aymer d’avantage, mais il est tres-certain aussi, que celle d’une personne desagreable, la fait encore plus hayr, d’autant que comme par l’ordinaire practique, nous venons à la cognoissance des perfections, de mesme par elle nous descouvrons mieux les imperfections cachées. Et par cette raison il advient presque tousjours, que ceste estroite pratique rompt plus d’amitiez, qu’elle n’en augmente, & qu’il semble que les petits esloi gnemens rendent l’Amour beaucoup plus violente. Je ne voudrois pas, ô mon ennemie ! expliquer d’avantage ce poinct, si je pensois que vous ne voulussiez vous en servir à mon desadvantage, mais cela me contrainct de dire, que vous avez faict comme ces mauvais Orateurs qui au lieu de soustenir la cause de leurs cliens, descouvrent les raisons qui leur sont contraires. Comment, bergere, pouvez-vous penser que la conversation ordinaire vous face plus aymer, puis qu’au rebours, c’est par elle, que vous faites voir les deffauts de vostre amitié qui sont tres-grands, & lesquels vous ne pouvez nier, puis que cent & cent fois je vous en ay convaincuë en presence de ma belle maistresse ?

Il seroit trop long, mon juge, & la recherche que j’en pourrois faire vous seroit trop ennuyeuse, si je voulois vous en faire souvenir par le menu, outre que je l’estime inutile, puis que vous avez assez bonne memoire, me semblant vous avoir ouy dire plusieurs fois, que vous vous en souviendriez en temps & lieu. C’est à cette heure le temps, ô ma belle maistresse, & voicy le lieu qu’il le faut faire, tant pour monstrer que vous estes juste, que pour donner tesmoignage que vous avez memoire de ce que vous promettez. Punissez-la ceste glorieuse bergere, tant pour son outrecuidance, que parce que les perfections qui sont en vous, ne peuvent souffrir les deffauts d’une si parfaicte amitié que la sienne : Et par ainsi, ô Philis ! vous cognoistrez que l’advantage que vous pretendez de ceste particuliere pratique, vous est plus ruineuse que favora ble : & à la verité, ce que vous avez allegué en cela, a plus du reproche que de la raison, puis que vous estes plus pres de ma belle maistresse que moy, vous sçavez bien qu’il n’est pas raisonnable, & que j’en ay assez de desplaisir, sans que pour l’augmenter, vous me le remettiez ainsi devant les yeux, & toutefois, ny mesme en cela vous n’avez point d’avantage par dessus moy, au contraire je pense que si toutes choses sont bien considerées, je l’auray par dessus vous ; Puis que la demeure que vous faictes auprés d’elle, c’est seulement le jour, & encore de ce temps-là vous en employez une grande partie hors de sa presence, soit aux affaires de vostre maison, ou à d’autres divertissemens desquels vous ne pouvez vous desrober, & par ainsi bien souvent ce que vous donnez à ma belle maistresse, c’est la moindre partie du jour : Mais moy au contraire, quand est-ce que le jour me surprend, que je ne sois aupres d’elle ? Quand est-ce que la nuict me vient trouver ailleurs ? Et quels divertissements m’en peuvent separer ? Il faut, bergere, que vous sçachiez que tant s’en faut que ces choses qui sont hors de moy, m’ayent peu trouver en autre part qu’avec elle, que moy-mesme je ne me suis jamais pris garde d’avoir esté en quelque autre lieu, depuis que j’ay commencé de l’aymer continuellement, Philis, je la voy, continuellement je la contemple, & continuellement je l’adore, & vous pouvez dire que vous estes plus souvent auprés d’elle que je ne suis ? O bergere ! ostez cette opinion de vostre ame, & croyez qu’elle mes me n’y peut estre plus souvent que moy, & si je ne craignois de dire trop, & pardessus la creance de la plus grande partie de ceux qui m’escoutent, je dirois avec verité, que je suis encores plus souvent aupres d’elle, qu’elle mesme : Et il est vray que j’y suis plus souvent : car elle quelquefois se divertit par la presence des autres bergeres, quelquefois pour parler à elle, & quelquefois pour leur rendre les devoirs d’amitié, & de la courtoisie, & quelquefois pour les soucis des affaires domestiques, au lieu que moy je suis continuellement attaché auprez d’elle, comme Promethée sur son rocher, ou plustost comme le corps & l’ame le sont ensemble par les liens de la vie : car il n’est pas plus naturel au corps de mourir aussi tost que l’ame s’en separe, qu’il seroit asseuré que je mourrois, si je me separois un moment de cette belle pensée.

Je voy bien bergere, que vous riez de m’ouyr dire que je suis continuellement auprez de ma maistresse, puis que vous croyez que cela n’estant que de la pensée, je suis personne qui me contente fort des imaginations. Que voulez vous, Philis, que j’y fasse ? J’avouë que si j’y pouvois estre & de la pensée & du corps, je serois encor plus content : mais si vous diray-je bien, que de la façon que j’y suis, j’y suis plus parfaictement que vous, puis que le plus souvent que vous y estes de la presence, vous en estes infiniment esloignée par la pensée, qui vous emporte ordinairement fort loing de là, ne laissant où il semble que vous soyez, que le corps, qui est la moindre partie de vous, au lieu que la mienne n’ayant ny desir, ny contentement qu’aupres d’elle, elle n’en part jamais pour quelque divertissement qui se puisse presenter. Que si vous dites que ces pensées sont bien incapables, & bien inutiles pour la servir, puis que ce ne sont que des imaginations : Ah ! bergere, prenez garde que par mesme moyen vous ne blasmiez ces intelligences, qui n’adorent le grand Tautates qu’avec la pure pensée, & qui continuellement ne parlent & ne conversent avec luy que par la voye de la contemplation. Et vous semble-t’il, que le moyen avec lequel je suis aupres de Diane, soit inutile & tant incapable de la servir, puis que je la sers & l’adore en terre, comme ces pures pensées servent & adorent le grand Tautates dans le Ciel. Ce seroit un blaspheme de le penser, & plus grand encore de le dire, & duquel je m’asseure vous ne demeureriez pas longuement impunie.

Vous voyez donc, ô Philis, combien cette raison que vous avez alleguée est meilleure pour moy que pour vous : &royez que celle que vous dites de l’avantage du sexe duquel vous estes favorisée par-dessus le mien, n’est pas moins confusion. Car j’avouë, & je l’avouë avec verité, que cles femmes sont veritablement plus pleines de merite que les hommes, voire de telle sorte, que s’il est permis de mettre quelque creature entre ces pures & immortelles intelligences, & nous ; Je croy que les femmes y doivent estre, parce qu’elles nous surpassent de tant en perfection, que c’est en quelque sorte leur faire tort, que de les mettre en un mesme rang avec les hommes : outre que nous pouvons avec raison les estimer un juste milieu pour parvenir à ces pures pen sées, (c’est ainsi que les plus sçavans les nomment presque ordinairement) puis que nous apprenons par l’experience, que c’est d’elles que toutes les plus belles pensées que les hommes ont, prenent leur naissance, & que c’est vers elles qu’elles courent, & en elles qu’elles se terminent : Et qui doutera qu’elles ne soient le vray moyen pour parvenir à ces pures pensées, & que Dieu ne nous les ait proposées en terre pour nous attirer par elles au Ciel, où nos Druydes nous disent devoir estre nostre eternel contentement ? Quant à moy je l’avouë, je le croy, & je suis prest à le maintenir jusques à la fin de ma vie : mais que pour cela vous deviez estre plus aymée de ma maistresse, ô bergere ! rayez cette opinion de vostre creance, tant s’en faut, je croy qu’il doit faire un contraire effect.

Nous avons dit, que quand quelque chose fait tout ce que la Nature luy permet de pouvoir faire, & qu’elle s’esleve à toute la hauteur où elle peut naturellement se hausser, elle est grandement estimable, &maintenant je dis que celuy qui faict moins que ce que naturellement il peut faire, doit estre beaucoup plus blasmé, & mesme quand c’est une chose de soi-mesme loüable, que si par la naturelle impuissance il laisse de la faire. Par cette raison, comment bergere, ne serez-vous bien fort taxée, estant née fille, qui est un sexe si parfaict, qu’il tient le milieu entre ces purs entendemens & nous, d’aymer si imparfaictement que vous faites, & mesme un subject si plein de perfection ? Je tiens pour certain, que Diane si quelquefois elle a daigné jetter les yeux sur nous, & je croy que sa douceur, sa bonté & sa courtoisie naturelle, le luy a fait faire bien souvent : Je tiens pour asseuré dis-je, qu’elle n’a jamais consideré mon extreme affection sans l’estimer, ny la foiblesse de vostre amitié sans la blasmer : car elle a veu la mienne si parfaite & entiere, & tellement exempte de toute reproche, qu’elle n’a peu moins faire que de loüer grandement, qu’un sexe tant imparfait que celuy des hommes, ait peu en moy comporter une si parfaite Amour que la mienne. Et au contraire, elle n’a peu considerer en vous une amitié si pleine de deffauts & de manquemens, sans mesestimer celle qui est cause que le sexe des femmes qui est de tant avantagé de la nature par-dessus le nostre, soit tant inferieur en l’amour à celuy d’un homme.

Mais voicy d’autres raisons, ma maistresse, qu’elle allegue contre moy, qui ne sont guere plus à son advantage, pour m’accuser envers Amour du crime de leze Majesté. Elle dit que toutes les demonstrations que j’ay faites de vous aymer, n’ont esté que des feintes & des desguisemens, & il luy semble de bien preuver cette calomnie, quand elle dit que c’est par gageure que je vous ayme, & qu’auparavant je ne vous aymois point. Mais je vous supplie, mon juge, prenez bien garde aux mauvaises consequences qu’elle tire de ses presuppositions. J’avouë, Philis, que c’est par gageure que j’ayme Diane, & que ceste gageure a donné commencement à mon affection, mais faut-il conclure pour cela que mon Amour ne soit que dissimulation, ou que pour n’en avoir point aymé d’autres auparavant, je n’ayme point maintenant Diane ? Nullement, bergere, car encore que par gageure on coure à qui attaindra plustost le terme proposé, faut-il croire que l’on ne coure pas pour cela à bon escient ? Au contraire n’est-ce pas la gageure, & le desir de vaincre qui nous fait faire des efforts veritables, qui semblent presque par-dessus nos forces, en nous attachant des aisles aux pieds, tant la naturelle inclination que chacun a en soy de surmonter, a de force en toute personne bien née ? Ne dites donques plus, mon ennemie, que mes extremes passions, que mes trespas, & mes transports soyent des déguisements, des feintes, & des dissimulations, car il est vray que j’ay aymé par gageure, mais il est encore plus certain que mon affection est tellement veritable & asseurée, que je ne suis pas plus vrayement Silvandre, que je suis avec toute verité serviteur de cette belle Diane : Et ne faut penser, qu’encores qu’auparavant je n’eusse point d’Amour pour elle, maintenant aussi je n’en aye point. Qui voudroit tirer cette conclusion de cette sorte, pourroit de mesme dire que Philis n’est point au monde, parce qu’autrefois elle n’y a point esté, car, bergere, s’il vous disoit avant que de naistre, Vous n’estiez point née, doncques vous ne l’estes point encore, diroit comme vous, lors que pour preuver que je n’ayme point Diane, vous dites qu’il y a cinq ou six Lunes que je ne l’aymois point. Si vous disiez qu’il n’y a pas long temps que cette amour est née, vous diriez vray, & je l’avouërois avec vous, & non pas sans beaucoup de regret d’avoir vescu un si long âge, sans l’avoir employé en son service : mais quand vous taschez de preuver que je ne l’ayme point, parce qu’il y a quelques temps que je ne la cognoissois point, & qu’est ce dire autre chose, sinon que celuy qui n’est pas nay aujourd’huy, ne naistra jamais plus ?

Or maintenant voyez, ma maistresse, comme elle se contredit sans y penser, mais ne vous en estonnez point, car c’est le propre du mensonge, & de la calomnie, de se contredire & d’estre diverse, au lieu que la verité est tousjours une. Mais confessons luy, dit-elle, que vostre beauté l’ait attaint un peu, & que par ce moyen il soit en quelque sorte à vous. Et quoy, Philis, vous dites que vous avez de l’Amour pour cette belle Diane, & que l’ordinaire pratique que vous avez d’elle, vous donne plus de commodité d’en recognoistre les perfections, & comment entendez vous ce que vous venez de dire ? Confessons luy, dites vous, que vostre beauté l’ait attaint un peu, & que par ce moyen il soit en quelque sorte à vous. Est-il possible si vous avez recognu les perfections de Diane, que vous puissiez croire que l’on les puisse aymer un peu ? O ignorante de la force de sa beauté ! Jamais il ne part de sa main un coup qui ne porte jusques au cœur, & le cœur n’est jamais attaint que la blesseure n’en soit mortelle. Vous pourriez parler de cette façon des communes beautez qui se remarquent en quelques autres bergeres, & lesquelles quand elles esgratignent un peu la peau, l’on pense qu’elles ont fait une tres-grande preuve de leur force, mais de celle de Diane, ô que les coups vous en sont bien incogneus, puis que vous en parlez de cette sorte. Aprenez de moy, ô mon ennemie, que le lezard qu’on dit ne demordre jamais, & que la Remore qui peut arrester la violence d’un vaisseau, qui a le vent à pleines voiles, s’attachent avec moins de fermeté que ces perfections depuis qu’elles ont touché un cœur : soyez tres-asseurée que les nœuds Gordiens qu’on estimoit indissolubles, peuvent estre desnoués plus aisément, que ceux desquels elle lie une ame, quand une fois elle l’a prise : Et croyez pour chose tres-veritable, que le feu dont nos Druydes nous disent, que tout l’Univers à sa fin doit estre embrasé, cede & en grandeur & en violence à la moindre estincelle de celuy dont ses yeux bruslent ceux qui les voyent. Et ne dites plus, peu experimentée bergere, que l’on peut l’aymer un peu, ou que l’on peut estre en quelque sorte à elle, tous ceux qui l’aymeront, ce sera extremement, & tous ceux qui seront à elle le seront entierement : & lors que vous dites que je l’ayme un peu, vous confessez sans y penser que je suis le plus amoureux homme du monde, & par consequent qu’il n’y a rien qui se puisse égaler à la grandeur de mon affection : que si ces paroles peuvent faire rire, je pense que ce seront ceux qui ne sçauront quels sont les effects d’Amour, ou qui n’en auront jamais ressenty les blessures : car les autres compatiront à mon mal par le sentiment qu’ils auront du leur. Mais à vous Philis, il est permis de parler de cette sorte, & de vous moquer de la grandeur de mon affection, qui vous estes trouvée un sujet incapable d’en estre touché, ou plustost qui n’avez jamais tourné les yeux sur le subjet qui peut faire mourir d’amour tous ceux qui le verront. Mais, ma maistresse, voyez je vous supplie, quelle reproche mon ennemie me faict, pour preuver que je ne vous ayme point, ou pour faire mespriser mon affection, & jugez par là si elle a ouy parler quelquefois d’Amour ? N’est elle pas bien gracieuse quand elle m’accuse de n’avoir jamais rien aymé que vous, & que vous estes la premiere qui m’avez surmonté ? J’avouë que voicy un blasme duquel je n’ay jamais ouy parler, & duquel toutefois je me dis librement coulpable : car il est vray que vous avez esté non seulement la premiere & la seule que j’ay aymée, mais de plus que vous serez encore la seule & la derniere que j’aymeray jamais : & s’il advient autrement, escoutez bien mon ennemie, afin que vous continuyez à m’accuser de cette faute. Et s’il advient dis-je autrement, ô Soleil qui m’esclairez, ô air qui me laissez respirer, & vous, ô terre qui me soustenez, & qui me nourrissez, couvrez mes yeux d’eternelles tenebres, estouffez mon cœur parjure, & m’engloutissez dans vos abismes, comme indigne devoir, de vivre, ny d’estre veu. Je monstreray par mon unique affection, que comme il n’y avoit rien qui fust capable de m’apprendre à aymer que la seule beauté de Diane, de mesme il n’y a point d’autre cœur qui puisse jamais arriver à l’aymer : & j’apprendray aux plus sçavans par l’eternelle durée de mon amour, qu’ils se trompent quand ils nous enseignent, que tout ce qui a eu commencement doit avoir une fin : car ô Philis, cette affection que vous vous vantez d’avoir veu naistre, ne vous servira pas seulement, mais tous les siecles à venir.

Que si cette unique & eternelle affection est estimable, & si celle à qui elle s’adresse m’en veut faire quelque grace, & comment bergere pouvez vous dire qu’elle vous soit deuë ? Est-ce comme vous presupposez que vos reproches ont esté cause de cette amour, & que tout ce qui en est procedé, vous doit estre attribué comme à celle qui en est l’origine ? Prenez garde, Philis, que cela vous estant accordé, il ne soit fort à vostre desavantage : car ceux qui sont cause du mal en doivent estre chastiez : mais si comme vous dites, ma maistresse se doit plustost mocquer de moy, que d’avoir esgard à ma peine ; il s’ensuivra que ce sera de vous de qui elle se rira, & non pas de Silvandre, puis que vous vous en attribuez toute chose.

Mais n’ayez peur, bergere, je ne veux pas vous quitter mes justes pretensions à si bon marché : Lors que quelqu’un faict par autruy quelque chose, il faut considerer quelle est l’intention de celuy qui l’a faict faire : car si son intention est bonne, il ne doit point estre blasmé du mal qui en arrive, pourveu que d’ailleurs il n’en soit point coulpable, non plus que si son dessein estoit mauvais, il ne doit point avoir part à la gloire ny au profit qui en procede. Or si vous m’accordez ce que je dis, je croy que personne ne le peut nier, voyons avant que vous donner ny loüange ny blasme, quelle estoit vostre intention, lors que nostre gageure fut proposée par vous. Nous n’aurons pas, ma maistresse, beau coup de peine à le descouvrir, car elle mesme la nous a dite : Les desguisemens, a-t’elle dit, & les feintes recognuës apportent de la haine : mais Diane sçait que toutes tes recherches ne procedent que de la gageure que tu as faite, & que tout ce qui s’en est ensuivy n’est que par feinte, donc elle te doit vouloir mal. Voyez vous, ma maistresse, comme elle a pensé qu’en cette gageure je n’userois que de feinte & de dissimulation : & puisque l’on est loüable ou blasmable par l’intention, ne la condamnerez vous pas coulpable de tous les desguisemens, de toutes les dissimulations, & de toutes les feintes dont elle m’accuse, & desquelles elle pensoit que je me deusse servir ? Et n’ay-je pas juste raison de dire, C’est vous, ô Philis, qui par la gageure m’avez donné feintement à cette belle Diane : mais c’est mon cœur, qui veritablement m’a donné à elle, par la cognoissance qu’il a eu de ses perfections : Donques à vous se doivent les chastimens avec lesquels les feintes & les tromperies doivent estre chastiées, & à mon cœur les faveurs & les graces, qu’une veritable affection peut meriter.

Ne me dites donc plus que je vous quitte cette pretenduë victoire, pour monstrer mon esprit & mon jugement, mon esprit ayant sçeu si bien déguiser une fausse affection, sous le visage d’une veritable Amour, & mon jugement pour avoir si bien recogneu l’avantage que vous avez par-dessus moy. Car au contraire je monstrerois à tous que je n’ay point d’esprit, si j’avois aymé feintement ce qui est le plus digne en l’univers d’estre parfaitement aymé : & je donnerois cognoissan ce de n’avoir point de jugement, si je ne cognoissois bien l’avantage que ma vraye & parfaite affection me donne par-dessus la vostre feinte & si pleine de deffauts. Je veux, bergere, que vous confessiez vous mesme le contraire de ce que vous me reprochez, & que vous soyez la premiere qui direz, voyant la durée de mon Amour & sa perfection, qu’il n’y a point d’affection pour mal commencée qu’elle soit, & à qui par gageure ou pour passe-temps, on se laisse embarquer, qui ne puisse se rendre tres-veritable & tres-asseurée, puis que celle-cy à qui un gracieux essay a donné naissance, s’est renduë telle en moy, que les années & les siecles qui peuvent mesurer toute l’estenduë du temps, auront moins de durée en l’univers que ceste affection en mon ame.

Mais, ô mon ennemie, toutes ces considerations, & tous ces discours sont bien en vain, ce me semble, puis que ce n’est qu’entre nous que nous debattons à qui aura la victoire, ce n’est pas là où gist la difficulté. Je ne doute point que ce chapeau de fleurs que j’ay mis aux pieds de Diane, ne me fust acquis avec raison, s’il falloit que quelqu’un de nous eust cette victoire que nous pretendons : Mais, helas : ô Philis, j’ay grande peur, & ce n’est pas sans raison, si je crains qu’elle ne sera ny à l’un, ny à l’autre, car tout ce que nous avons allegué pour meriter son amitié, pourroit bien avoir lieu pour le regard de quelque autre, mais pour Diane nullement. Diane de qui les perfections & les merites surpassans toutes les forces de la nature, mesprisent aussi toutes les loix qu’elle donne aux mortels. Et par ainsi quand nous disons que l’Amour se doit payer par Amour, & que les longs & fideles services sont dignes d’estre recogneus, ce sont veritablement des raisons pour les hommes, & qui les obligent à les ensuivre, mais nullement pour Diane, en qui le ciel a voulu mettre tant de graces, que la relevant par dessus les mortels, elle l’a voulu égaler à ceux qui habitent parmy les estoilles. A qui faut-il donc que je m’adresse ? & à quoy faut-il que je recoure ? m’adresseray-je à l’Amour, & recourray-je à la justice avec laquelle toutes les choses sont balancées & recompensées ? Mais comment ne sera-ce inutilement, puis qu’Amour n’a rien affaire avec Diane, & que ce qui est juste pour toute autre, seroit injustice pour elle. Adressons nous ô Silvandre, & recourons à elle mesme, & laissans là toutes les autres puissances, & toutes les autres raisons, disons luy.

A ce mot, il se jetta à genoux devant Diane, & puis luy tendant les mains, il continua.

O Diane, l’honneur non seulement de ces Forests & de ces rivages, mais la gloire de tous les hommes, & l’ornement de tout l’univers : Vous voyez devant vous un berger, qui non seulement vous ayme, & vous offre son service & sa vie, mais vous adore, & vous sacrifie & son cœur & son ame, avec une si entiere affection, ou plustost devotion, que tout ainsi que la nature ne peut plus rien faire qui se puisse égaler à vous, aussi l’Amour ne sçauroit plus allumer une si grande, ny si parfaicte affection dans quelque autre cœur que ce soit : Et toutefois le grand Tautates s’est pleu à vous avantager de telle sorte par-dessus les œuvres de ses mains, qu’encores que je sçache bien que cette extreme Amour & entiere devotion me pourroit faire esperer avec raison de toute autre quelque grace & quelque faveur, & ne le recevant point donner lieu à mes plaintes & à mes doleances, si recognois-je bien que pour vous, cela ne peut estre, à qui tous les cœurs & tous les services des mortels sont deus, & qui ne peuvent vous estre refusez sans offence, ny vous estans rendus, meriter rien de plus avantageux pour nous, sinon qu’en vous aymant, servant, & adorant, nous vous rendons les devoirs ausquels tous les hommes vous sont obligez. Aussi je ne me presente pas maintenant devant vos yeux, pour vous demander quelque recompense de mes services, ny de mon affection, tant pour la consideration que je viens de dire, que d’autant qu’il n’y en a point qui soit digne d’elle, que le seul honneur d’estre aymé de vous, & cette demande seroit une outrecuidance trop extreme, & par dessus toutes mes esperances, mais seulement pour vous supplier par la chose du monde que vous avez la plus aymée, & (si jusques icy rien n’a esté assez heureux pour avoir eu cette faveur) je vous requiers par la personne bien-heureuse, que le destin vous ordonnera d’aymer, de vouloir seulement rendre un favorable, mais juste tesmoignage, que je sçay veritablement bien-aymer, & qu’il n’y a personne qui ayme mieux que Silvandre, ny qui merite mieux d’estre aymé pour une vraye Amour & parfaite affection.

Silvandre acheva de parler de cette sorte, & sans se vouloir relever, quelque signe que Diane luy fit de la main, il voulut attendre à genoux son jugement : & parce que Philis vouloit repliquer sur ce que Silvandre luy avoit respondu, Adamas voyant que l’heure de partir pressoit, luy dit, qu’elle ne le pouvoit plus faire, parce qu’il n’avoit tenu qu’à elle de dire tout ce qu’il luy avoit pleu : de sorte que Diane apres avoir quelque temps consideré ce qu’elle avoit à dire, parla en fin de cette sorte.

JUGEMENT
De la Bergere Diane.

L’Amour estant l’une de ces choses, desquelles les effets doivent rendre plus de tesmoignage que les paroles : & le different qui est entre Philis & Silvandre estant de cette qualité, nous n’avons pas voulu mettre moins de soing à remarquer leurs actions & toutes les choses qui se sont passées jusques icy depuis le commencement de leur gageure, qu’à bien peser les raisons maintenant alleguées par tous les deux. Et ayant bien & meurement balancé, & consideré le tout, & usant du pouvoir qui en cét endroict nous a esté donné : NOUS DISONS & declarons, Que veritablement Philis est plus aymable que Silvandre : & que Silvandre se sçait mieux faire aymer que Philis. Et pour ne laisser personne en doute de nostre intention, NOUS ORDONNONS que Philis s’asseoira dans le sie ge où je suis, & que Silvandre me baisera la main : & en fin que Philis rendra son chapeau de fleurs au sage Adamas qui le luy a donné, & Silvandre reprendra le sien de mes mains, & le portera tousjours à l’avenir, en le renouvellant lors qu’il flestrira, afin que cette marque luy en demeure eternelle parmy les autres bergers.

A ce mot, elle se leva, & alla prendre Philis par la main, & luy faisant rendre son chappeau de fleurs au Druyde, la fit asseoir dans le siege où elle estoit, & relevant la Guirlande de Silvandre, la mit sur la teste au berger, & luy tendit la main tout à genoux qu’il estoit, afin qu’il la baisast, ce qu’il fit avec tant de contentement & de transport, que la bergere cognut bien (si elle ne l’avoit faict encore) que ce n’estoit point un baiser qui procedast d’une feinte affection.

Fin du neufiesme Livre.